ਜ਼ਿਕਰ-ਏ-ਮੀਰ

ਮੀਰ ਉਰਦੂ-ਫ਼ਾਰਸੀ ਸ਼ਾਇਰੀ ਦੇ ਕੁਝ ਬਿਹਤਰੀਨ ਸ਼ਾਇਰਾਂ ਵਿਚੋਂ ਇਕ ਸਨ. ਉਨ੍ਹਾਂ ਨੇ ਆਪਣੀ ਹਯਾਤੀ ਦੌਰਾਨ ਨਾ ਸਿਰਫ਼ ਸ਼ਾਇਰੀ ਹੀ ਕੀਤੀ, ਬਲਕਿ ਆਪਣੀ ਇਸ ਆਤਮਗਾਥਾ “ਜ਼ਿਕਰ-ਏ-ਮੀਰ” ਰਾਹੀਂ ਇਤਿਹਾਸਕ ਤੇ ਰਾਜਨੀਤਿਕ ਘਟਨਾਵਾਂ ਨੂੰ ਕਲਮਬੱਧ ਕਰ ਕੇ ਆਪਣੀ ਪ੍ਰਚੱਲਿਤ ਪਛਾਣ ਨੂੰ ਹੋਰ ਵਧੇਰੇ ਵਿਸਤ੍ਰਿਤ ਕੀਤਾ. ਮੀਰ ਦੀ ਇਹ ਕਿਤਾਬ ਨਾ ਸਿਰਫ਼ ਉਸ ਦੇ ਜੀਵਨ, ਬਲਕਿ ਭਾਰਤੀ ਇਤਿਹਾਸ ਦੀਆਂ ਵੀ ਬਹੁਤ ਸਾਰੀਆਂ ਸੂਖ਼ਮ ਪਰਤਾਂ ਨੂੰ ਸਾਡੇ ਸਾਹਮਣੇ ਪੇਸ਼ ਕਰਦੀ ਹੈ. ਨਿਰਸੰਦੇਹ ਭਾਰਤੀ ਇਤਿਹਾਸ ਅੰਦਰ ਤਤਕਾਲੀ ਇਤਿਹਾਸ ਦੇ ਸਮਕਾਲੀ ਸਬੂਤ ਮੀਰ ਤੋਂ ਇਲਾਵਾ ਹੋਰ ਕਿਸੇ ਥਾਂ ਬਹੁਤ ਘੱਟ ਹੀ ਦਿਖਾਈ ਦਿੰਦੇ ਹਨ.